Мэдээ

     Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 52 дугаар зүйлийн 52.1.2 дахь заалтад үндэслэн 2019 оны худалдан авах ажиллагааг зохион байгуулахад анхаарч ажиллах дараах чиглэлийг хүргүүлж байна.

     Нэг. Монгол Улсын Их Хурал 2018 оны 11 дүгээр сарын 02-ны өдөр “Монгол Улсын 2019 оны төсвийн тухай хууль батлагдсантай холбогдуулан авах зарим арга хэмжээний тухай" 80 дугаар тогтоолыг баталсан.

     Энэ тогтоолын 1 дүгээр зүйлийн 1 дэх хэсэгт “улсын төсвийн хөрөнгө оруулалтаар 2019 онд шинээр санхүүжүүлэх хөрөнгө оруулалтын төсөл, арга хэмжээг хэрэгжүүлэх бэлтгэл ажлыг шуурхай зохион байгуулах, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагааг хууль тогтоомжийн дагуу шийдвэрлэж ажиллах” үүргийг даалгасан.

     Иймд Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 46 дугаар зүйлийн 46.1.8 дахь заалт, Монгол Улсын Их Хурлын 2018 оны 80 дугаар тогтоолын 1.1 дэх хэсэгт заасны дагуу улсын болон орон нутгийн төсвийн хөрөнгө, бусад эх үүсвэр, өөрийн хөрөнгөөр санхүүжүүлэх барилга, зам, инженерийн шугам сүлжээ зэрэг улирлын шинж чанартай төсөл, арга хэмжээний худалдан авах ажиллагааг шуурхай зохион байгуулан хуулийн дагуу шалгарсан гүйцэтгэгчтэй гэрээ байгуулж, төсөл, арга хэмжээний ажпыг эхлүүлж ажиллахад онцгой анхаарч ажиллах.

     Хоёр. Засгийн газрын 2019 оны 01 дүгээр сарын 30-ны өдрийн хуралдаанаас Үндэсний үйлдвэрлэлээ дэмжиж импортыг бууруулах, ажлын байр нэмэгдүүлэх, төсвийн хөрөнгийн үр ашгийг сайжруулах зорилгоор 2019 оныг “Эх оронч худалдан авалтын жил” болгон зарлаж, дотоодын үйлдвэрээс худалдан авсан барааны тайланг хагас жил тутам тайлагнаж байхыг төсвийн ерөнхийлөн захирагч нарт даалгасан болно.

     Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 10¹ дүгээр зүйлийн 10¹1 дэх хэсэгт “Чанар, стандартын шаардлага хангасан барааг дотоодын үйлдвэрлэлээр хангах боломжтой тохиолдолд тендер шалгаруулалтад гадаадын бараа нийлүүлэгчийг шалгаруулахыг хориглоно.” гэж заасны дагуу Засгийн газрын 2015 оны 336 дугаар тогтоолыг хэрэгжилтийг хангах шаардлагатай байна.

     Түүнчлэн, Сангийн сайдын 2018 оны 12 дугаар сарын 17-ны өдрийн 281 дүгээр тушаалын хавсралтаар батлагдсан “Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагааг төлөвлөх, тайлагнах журам”-ын 2.3-т “Худалдан авах ажилагааг төлөвлөхдөө хуулийн 8.6 дахь хэсгийн дагуу багцлах тохиолдолд хуулийн 10¹ зүйлд заасан дотоодын үйлдвэрээс авах боломжтой барааг импортын бараанаас тусад нь багц болгоно.” гэж журамласан байна.

     Иймд хууль тогтоомж болон Засгийн газраас өгсөн үүргийн дагуу дотоодын үйлдвэрлэлийг дэмжих ажпын хүрээнд бараа худалдан авах ажиллагаа зохион байгуулахдаа үндэсний үйлдвэрлэлийн барааг импортоор ирж байгаа бараанаас тусад нь багцлан зохион байгуулж, дотоодын үйлдвэрээс худалдаж авсан барааны талаарх тайланг холбогдох төрийн захиргааны төв байгууллагад хагас жил тутам хүргүүлж ажиллах шаардлагатай.

     Гурав. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 21 дүгээр зүйлийн 21.4 дэх хэсэг, Авлигатай тэмцэх үндэсний хөтөлбөрийг хэрэгжүүлэх арга хэмжээний төлөвлөгөөний 4.1.4.3 дахь заалтад заасны дагуу 2019 оны худалдан авах ажиллагааг цахимаар (tender.gov.mn) зохион байгуулж, худалдан авах ажиллагааны төлөвлөгөө, тендерийн урилга, үр дүнг тухай бүр цахим системд оруулж худалдан авах ажиллагааны ил тод байдлыг хангахад онцгой анхаарч ажиллах шаардлагатай байх тул 2019 онд худалдан авах ажиллагааг зохион байгуулахдаа дээрх чиглэлийг харъяалах төсвийн шууд захирагч нарт даалгаж, биелэлтэд хяналт тавьж ажиллахыг хүсье.

Албан бичгийг доорхи холбоосоор татаж авна уу.