信息

Монгол Улсад импортоор орж ирж байгаа барилгын материалуудын хувьд чанар стандартын шаардлага хангахгүй бараа бүтээгдэхүүн, түүхий эдийг улсын хилээр оруулж ирэхгүй байх нөхцөлийг бүрдүүлэх зорилгоор Монгол Улсын шадар сайд С.Амарсайханы ажлын алба, Барилга хот байгуулалтын яам, Гаалийн ерөнхий газар, Стандарт хэмжил зүйн газар, Онцгой байдлын ерөнхий газар, Нийгмийн эрүүл мэндийн үндэсний төв, Барилгын хөгжлийн төв, Шударга өрсөлдөөн хэрэглэгчдийн төлөө газар, Төрийн худалдан авах ажиллагааны газар, МҮХАҮТ болон Барилгын ханган нийлүүлэгчдийн зөвлөл зэрэг байгууллага, аж ахуйн нэгжүүдийн төлөөллүүд оролцсон “Импортын барилгын материалын стандарт” хэлэлцүүлгийг 2023 оны 10 дугаар сарын 27-ны өдөр МҮХАҮТ-д зохион байгуулагдлаа.

 Хэлэлцүүлэгт Шадар сайд С.Амарсайхан “Импортын барилгын материалын стандарт, нөхцөл байдал, цаашид баримтлах бодлого”, Барилгын ханган нийлүүлэгчдийн зөвлөл ТББ-ын тэргүүн Г.Батсүх “Барилгын материал импортлогч, үйлдвэрлэгч нарт тулгамдаж буй асуудал, шийдвэрлэх гарц шийдэл”, Нийгмийн эрүүл мэндийн үндэсний төвийн Хор судлал, шуурхай удирдлагын албаны дарга Б.Баттүвшин “Барилгын материалын хүний эрүүл мэндэд үзүүлэх сөрөг нөлөөлөл” сэдвээр тус тус итгэл тавьлаа.  Уг хэлэлцүүлэг “Барилгын материалын стандарт, гарц шийдэл”, “Улсын төсвийн хөрөнгөөр баригдаж буй барилга байгууламжуудын чанар, стандарт” гэсэн 2 сэдвийн хүрээнд явагдсан бөгөөд эхний хэлэлцүүлгийн модератороор Төрийн худалдан авах ажиллагааны газрын дарга Ц.Батзул ажиллав.  

Хэлэлцүүлэгт импортын барилгын материалын стандарт, нөхцөл байдал, цаашид баримтлах бодлого, чанар аюулгүй байдал, норм дүрмийн хэрэгжилт, гарц шийдлийн талаар санал солилцож, хэлэлцүүлгээс гарсан зөвлөмжийг Засгийн газрын хуралдаанд танилцуулж, холбогдох байгууллагуудад үүрэг чиглэл өгч шийдвэрлүүлэх юм.